Pengantar/Pembukaan
Sambah sujuik jo simpuah, sabarek buka nan piawai, naraco luruih main daun, indak basisiak jo basibak, indak bahinggo jo babateh, kok ketek indak basabuik namo, kok gadang indak babilang gala, ujuikno sambah nan taserak kapado hadiran sadonyo.
Dari sintuak kasanding baka, urang mamukek pagi pagi, dari ujuang taruih ka pangka, dari tangah sampai katapi, indak ba atok jo barompai, bukan bahinggo jo babateh, ketek indak basabuik namo, gadang indak bahimbau gala, ujuik taucap nan tapanggi nan hadir diateh rumah nangko.
(Seterusnya …….kemudian disambah hadirin sasuai pangkek jo fungsinyo.)
Badan Pemerintah
Sambah kapado bapak bupati sarato jo pak LKAAM, pak kapolres dan pak Kajari saganok muspida kasadonyo. Pusek jalo kumpulan ikan nan maatur nagari nangko, sakali gawa baribu ampun. ……..
Perangkat Adat
Sambah kapado niniak mamak, nan gadang basa batuah, nan ba aka baurek tunggang, babatang badahan rampak, badaun baujuang rantiang, baputiak babungo kambang, babuah kato nan bana, buliah baselo diureknyo, buliah basanda dibatangnyo, gantuangan cupak nan duo, paratamo cupak asli nan kaduo cupak buatan.
Sambah kapado niniak mamak, nan gadang basa batuah, nan bapucuak sabana bulek, nan baurek sabana tunggang, nan tinggi tampak jauah, nan gadang jolong basuo, kapai tampaik batanyo, kapulang tampaik babarito.
Ditulis oleh Amiral Agus Rajo Lelo
